Бөгетсайда ұлттық спорт түрлерінен жарыс өтті
Хромтау ауданына қарасты Бөгетсай ауылдық «Ақнұр» мешітінің имамы Наурызбай Қуантайұлы ауылдық округ әкімдігімен бірлесіп оқушылар арасында ұлттық спорт түрлерінен тартысты жарыстар өткізді. Тағылымды шараның басты мақсаты – жас ұрпақты салауатты өмір салтына баулу, ұлттық құндылықтарды дәріптеу және жастардың спортқа деген қызығушылығын арттыру болды.
Жарысқа ауыл жастары белсене қатысып, өзара бақ сынасты. Атап айтқанда, қазақтың төл спорты – қазақша күрес, гір тасын көтеру, арқан тартыс және қол күрес түрлері бойынша сайыстар ұйымдастырылды. Әр спорт түрі тартысқа толы өтіп, қатысушылар өздерінің күш-жігерін, ептілігі мен төзімділігін көрсете білді.
Шара барысында имам Наурызбай Қуантайұлы жастарға ізгі тілегін білдіріп:
— «Ұлттық спорт – ұлттың рухы. Осындай жарыстар арқылы біз жастарды бірлікке, күштілікке, сабырлыққа тәрбиелейміз. Дені сау, рухы мықты ұрпақ – елдің болашағы», – деп атап өтті.
Жарыс соңында жеңімпаздар мен жүлдегерлер арнайы марапатталып, ақшалай сыйлықтарға ие болды.
