ҚМДБ Төрағасы, Бас мүфти Наурызбай қажы Тағанұлы өңір Бас имамдарына осындай сын сағатта көбірек истиғфар, салауат айтып, садақа ниетімен құрбандық шалуды ұйымдастыруды тапсырған еді.

Пайғамбарымыз (с.ғ.с.): «Науқастарыңызды садақа беріп емдеңіздер», - деп өсиет еткен. Әлемді шарпыған індеттің ілмегіне ілініп, науқастанған жерлестеріміздің аман-саулығы үшін Ақтөбе мешіттерінде нәпіл құрбандықтар шалынып, игі дұға жасалды. Жергілікті жамағаттың қолдауымен облысқа қарасты мешіттерде 10 ірі қара мал, 11 қой Алла разылығы үшін құрбандыққа шалынды. Әйел-қыздар секторы да бұл шарадан шет қалмай, ақтөбелік қыз-келіншектер бірігіп шараға атсалысты.

Нақтырақ айтқанда, Ақтөбе облыстық орталық «Нұр Ғасыр» мешіті 1 ірі қара, Мұғалжар ауданы 2 ірі қара, Ембі қаласы 1 ірі қара, Алға ауданы 1 ірі қара мен 1 қой, Байғанин ауданы 1 ірі қара, Хромтау ауданы 1 ірі қара мен 1 қой, Әйтекеби ауданы 2 қой, Мәртөк ауданы 2 қой, Ақтөбе қалалық мешіті 1 қой, Сүлеймен ата мешіті 2 ірі қара, Қабақ баба мешіті 1 ірі қара мен 1 қой, Әс-Сәлам мешіті 2 қой, Әйел-қыздар секторы 1 қой союды ұйымдастырды. Жалпы, алғанда 330 мұқтаж отбасыға шалынған нәпіл құрбандықтың 1 тонна 850 келі еті таратылды.

Сонымен қатар 13 шілде Ұлттық аза тұту күні болып жариялануына орай, «Бас мүфти Наурызбай қажы Тағанұлының бастамасымен еліміздегі республикалық, облыстық ірі-ірі мешіттерде және медреселерде, қарилар даярлау орталықтарында 100 Құран хатым оқылуда», - деп хабарлайды ҚМДБ баспасөз қызметі.

13 шілде күні елорда уақытымен сағат 13:00-де осы күндері қариларымыз оқып жатқан Құран Хатымның дұғасы жасалмақ. «Әзірет Сұлтан» мешітінде жасалатын Құран Хатым дұғасына Бас мүфтидің өз қатысады деп күтілуде. Бұл рәсімге ҚМДБ-ның Instagram желісіндегі ресми парақшасы және YouTube каналы арқылы онлайн қосылуға мүмкіндік бар.

Қазақстан мұсылмандары діни басқармасы еліміздегі барша мұсылман қауымын осы күндері шама келгенше Құран оқып, Алланы зікір етіп, кешірім тілеп және Пайғамбарымызға (с.ғ.с.) көптеп салауат айтып, республика имамдарымен, қариларымен 13 шілде күні бір мезетте ел амандығы үшін дұға жасауға шақырады.

Ақтөбе облыстық орталық

«Нұр Ғасыр» мешітінің

Баспасөз қызметі

Карантин кезінде жамағатқа имандылық тақырыбында насихат айтып, індеттің ілмегіне ілініп кетпесек екен деп үрейде жүрген халыққа үміт сыйлап, олардың көкейтесті діни сауалдарына жауап беру үшін Бас мүфти Наурызбай қажы Тағанұлы мешіттерде онлайн уағыздар айтуды қайта жандандыруды тапсырған болатын.