Ақтөбе облысының имамдары мерекелік медальмен марапатталды

ҚМДБ Төрағасы, Бас мүфти Наурызбай қажы Тағанұлы Ақтөбе облысына жасаған жұмыс сапары барысында облыстың орталық «Нұр Ғасыр» мешітінде өңірдің рухани өміріне елеулі үлес қосып жүрген 14 дін қызметкерін ҚМДБ-ның 35 жылдық мерейтойлық медалімен марапаттады.

Аталған марапат ҚМДБ-ның негізі қаланғанына 35 жыл толуына орай ел ішінде дін мен дәстүр сабақтастығын дәріптеп, халыққа діни-ағарту бағытында аянбай қызмет етіп жүрген имам-молдаларға көрсетілген құрметтің белгісі ретінде табысталды.

Салтанатты рәсім барысында Бас мүфти марапат иелерін құттықтап, олардың өңірдегі рухани тұрақтылықты сақтаудағы, жастарды имандылыққа тәрбиелеудегі, жамағатпен жүйелі жұмыс жүргізудегі еңбегін жоғары бағалады.

«Өздеріңіз жақсы білесіздер, биыл ҚМДБ құрылғанына 35 жыл толды. Ширек ғасырдан астам уақытта қаншама шаруалар атқарылды. Әлі де атқарыла береді. Құранның «Мұхаммед» сүресінің 7-аятында: «Уа, иман еткендер! Егер Алланың дініне қолдау көрсетсеңдер, Алла Тағала да сендерді қолдайды һәм аяқтарыңды тайдырмай хақ жолда нық басқызады» дейді. Біздің әрбір жұмысымыз Алланың дінін дәріптеуге бағытталған. Сондықтан біз бұл саланы өз жүрек қалауымызбен таңдағандықтан әрбір ісімізде ыждағаттылық пен ерекше ықылас танытуымыз тиіс.

Имам – қоғамды тәрбиелеуші, ағартушы ұстаз. Отаншыл, еңбексүйгіш, аманатқа адал, ата-анасын қадірлейтін иманды ұрпақ тәрбиелеуде имамның атқаратын рөлі ерекше. Аллаға шүкір, халқымыздың рухани дамуына, қоғамда отбасы құндылығының артуына ағартушы ұстаздар мен дін қызметкерлері үлкен үлес қосып келеді» деп Наурызбай қажы Тағанұлы дін қызметкерлерінің қоғам алдындағы жауапкершілігін атап өтіп, елдің бірлігі мен берекесін арттыру жолындағы игі істеріне табыс тіледі.

Шара имамдар мен ұстаздар, ҚМДБ Ақсақалдар кеңесінің мүшелері, «Әжелер» мектебі, БАҚ өкілдері қатысты.

Айта кетейік, марапатталған қызметкерлердің еңбек өтілі 20-30 жыл аралығында.

Ақтөбе облыстық орталық 

«Нұр Ғасыр» мешітінің баспасөз қызметі

МАРАПАТ ИЕЛЕРІ