ҰШЫР НИСАБЫ МЕН ШЫҒЫНЫ ҚАНДАЙ? атты пәтуа сағаты өтті
Ақтөбе облысына қарасты қала, аудан, ауыл мешіттерінде жұма уағызынан соң мешітке келген жамағаттың діни сұрақтарына жауаптар беріліп, «Пәтуа сағаты» өткізілді. Жиын барысында жамағат тарапынан құлшылық, отбасы, сауда-саттық және күнделікті өмірге қатысты түрлі сауалдар қойылды. Солардың қатарында «Ұшырдың нисабы қандай және қанша мөлшерде беріледі?» деген ауыл шаруашылығына қатысты сұрақ та қойылды.
Имамдар ұшырдың егіншілік және жерден алынатын өнімдерге қатысты берілетін зекеттің бір түрі екенін түсіндірді. Шариғатта табиғи жолмен, яғни жаңбыр, өзен немесе бұлақ суы арқылы суарылған егін өнімінен оннан бірі (10%), ал еңбек пен шығын жұмсалып, арнайы құралдар арқылы суарылған өнімнен жиырмадан бірі (5%) ұшыр ретінде беріледі.
Ұшыр мәселесінде Ханафи мәзһабында өнімнің мөлшеріне қатысты өзге зекет түрлеріндегідей нисабтың шарт етілмейтіні айтылды. Яғни жерден алынған өнімнің мөлшері аз немесе көп болуына қарамастан, ұшыр үкіміне жататын жағдайда оның тиісті мөлшері беріледі.
Сонымен қатар өнімді өсіруге жұмсалған шығындардың түрі де маңызды. Егістікке тұқым, тыңайтқыш, техника, суару және басқа да қажеттіліктерге жұмсалған қаражаттың ұшыр мөлшерін есептеуге әсері болуы мүмкін. Сондықтан нақты жағдайға қарай мамандардан діни кеңес алған жөн.
Дін мамандары ұшырдың мұқтаж жандарға жәрдем берудің, мал-мүлікті тазартып, берекесін арттырудың бір жолы екенін атап өтті. Жерден алынған өнімнің адал жолмен өндіріліп, оның тиісті ақысының берілуі мұсылманның жауапкершілігін көрсетеді.
«Пәтуа сағаты» барысында жамағаттың сауалдарына ҚМДБ-ның пәтуа ұстанымдары мен Ханафи мәзһабы негізінде жауаптар беріліп, ауыл шаруашылығымен айналысатын азаматтарға ұшыр мәселесіне мұқият қараудың маңызы түсіндірілді.
