Облыс Бас имамы Мәртөк ауданына іс-сапармен барды
Ауданға арнайы іс-сапармен барған Ақтөбе облысының Бас имамы Амантай Садиев Мәртөк ауданының әкімінің орынбасарымен кездесті. Кездесу барысында аудандағы діни тұрақтылық, рухани келісім, жат ағыммен күрес және жоғары діни мамандарды қызметке тарту мәселелері қозғалды. Жиын соңында Бас имам әкімшілікке Муфтият баспасынан шыққан «Бабалар ізімен» атты кітапты сыйға тарту етті.
Сондай-ақ Бас имам аудандық мешіттің жамағатымен кездесіп, Лұқман Хәкімнің өмірі мен хикметтері жайлы уағыз айтты.
Сапар барысында аудандық мұражайға барып, ауданның тарихымен танысты. Және Мұражай қорына ескі екі дана Құран кітабы мен фиқһ, шариғат жазылған көне арабша кітапты сыйға берді.
Сонымен қатар Мәртөк аудандық кітапханасында «Кітап – білім бұлағы» атты жамағатпен кездесу өткізді. Бас имам білім алудың маңыздылығы мен артықшылықтарына тоқталды. Артынша кітапхана қорына «Бабалар ізімен» атты кітапты тапсырды.
Кейін ауылдық Жайсан және Қызылжар ауылдарына барып, жаңадан салынып жатқан мешіттердің құрылысымен танысты. Кейін Сарыжар ауылдық мешітіне барып, қысқа дайындық жұмыстарын тексерді. Артынша жергілікті жамағатпен кездесіп, насихат айтты.
