Мұражайда әйел жамағатына құндылықтар таныстырылды
«Нұр Ғасыр» мешітінің ұстаздары Республика күнінің қарсаңында әйел жамағатына мұражайға экскурсия ұйымдастырды. Экскурсияның мақсаты жамағатқа мұражайдың таусылмас қазына екенін ұғындырып, өткен өмір тарихын, ескі табиғи заттардың қадір-қасиетін, өткен мен болашақты жалғастырушысы екенін түсіндіру.
Ақтөбе өңірлік тарихи-өлкетану муражайы еліміздің және өлкеміздің өткені мен бүгінін жалғап отырған облысымыздағы ірі мәдени ошақтың бірі.
Мұражайдың 8 залында орналастырған өлкенің пайдалы қазба кендері, жануарлар мен сирек кездесетін өсімдіктер, археологиялық қазба кезінде табылған еңбек құрал-жабдықтары, қыштан жасалған бұйымдар, қазақ-қалмақ соғыстары туралы құнды мәліметтер, сол кездегі қару-жарақ үлгілері қойылған. «Алаш» ұлттық-демокр. қозғалысы, саяси-қуғын сүргін құрбандары, осы өлкедегі зиялы қауым жөнінде құжаттар жинақталған.
Жамағатымызды қатты толғандырған «Дулығалы дала перзенттері» залы болды. Тарихи және мұрағаттық құжаттар, ескерткіштер арқылы өңір аумағындағы ұлт-азаттық қозғалыстар мен бас көтерулер, жекелеген батырлар мен қолбасшылар туралы сыр шертті.
1941-1945 жылдардағы Ұлы Отан соғысы оқиғаларына арналған зал облыс тумалары қатарынан шыққан майдангерлер мен батырлар туралы баяндайды.
Тұтас бір дәуірдің тарихын, этнографиясын ғасырдан-ғасырға жеткізіп отыратын тарихи-өлкетану мұражайын аралау сәтінде кітаптан оқыған тарихи оқиғалардың шынайы көрнісін көргендей жамағаттың қызығушылығы артып, патриоттық рухқа бөленіп шықты.
