Бас мүфти Тәуелсіздік күнімен құттықтады 1170

Бас мүфти Тәуелсіздік күнімен құттықтады

15 желтоқсан 2021 88 Оқу 1 минут

Наурызбай қажы ТАҒАНҰЛЫ,

ҚМДБ Төрағасы, Бас мүфти

 

Қадірлі отандастар!

Баршаңызды Алланың халқымызға нәсіп еткен нығметі – Тәуелсіздігіміздің 30 жылдық мерейлі мерейтойымен шын жүректен құттықтаймын. Сіздерге мықты денсаулық, әр отбасыға амандық, жұмыстарыңызға береке тілеймін.

Егемендігімізді баянды ету – баршаға ортақ асыл іс. Әр ата-ана өз ұрпағын тәуелсіздікті қастерлеуге үйретсе, мектеп мұғалімі оқушыны отаншыл болуға баулыса болашағымыз баянды болмақ.

Біз жастардың санасына «мен елімнің ертеңі үшін қандай үлес қоса алам?» деген ойларды сіңіріп, олардың қоғам алдындағы жауапкершілігін барынша сезіндіре түсуіміз керек.


Құрметті жамағат!

Әуелі Алланың қалауымен, Тәуелсіздігіміздің арқасында мешіттеріміздің есігі айқара ашылып, асыл дінімізбен қайта қауыштық. Құдайға шүкір, жоғалтқанымызды жаңғыртып, тарихымызды түгендедік.

Ендеше, біз Тәуелсіздік, Отан сынды қастерлі ұғымдардың аясында бірігіп, ел егемендігін нығайтуға үлес қосуымыз қажет. Өйткені, Құранда Аллаға Тағала: «Бір-біріңе ізгі істе көмектесіңдер» деп бұйырған.

Алла Тағала елімізге амандық, жерімізге тыныштық, халқымызға ауызбіршілік нәсіп еткей. Алланың берген сыйы – Тәуелсіздігіміз тұғырлы болғай. Әмин!