Жастар секторы Амал мерекесінде қарияларды құттықтады
Бүгін Рамазанның 14-ші күні және Амал мерекесі. Көрісу күніне орай Ақтөбе өкілдігінде «Жастар ісі» секторының өкілі Аслан Дәуірханұлы бастаған жастар қаламыздағы қарияасы бар үйлерге барып, мерекемен құттықтады.
Халқымыз Амал келгенде бір-бірінен амандық сұрасып, көрісіп, ізгі ниеттерін білдіреді. Міне, осы қағиданы негізге алып, Көрісу күнінде жастар үлкендерге арнайы барып, сәлем беріп, жеміс-жидектер салынған қоржындарды сыйлыққа беріп, табыстады. Ал қазыналы қарияларымыз жас буын өкілдеріне ақ батасын берді.
Асыл дініміз барша адамзатты үлкенге құрмет көрсетіп, алғысын алуға үндейді. Амал мерекесі – қол алысып, көрісетін күн ғана емес, жүрекке жылу сыйлайтын, мейірім мен бауырластық барынша дәріптелетін игі дәстүріміздің бірі.
Ақтөбе облыстық орталық
«Нұр Ғасыр» мешітінің баспасөз қызметі
