Өмір намазсыз азан мен азансыз намаздың арасындай
Бір күні жасы үлкен қариядан немересі:
– Ата! Бір адамның өмірі шамамен қанша уақыт? – деп сұрағанда, қария күлімдеп:
– Азан мен намаз арасындағы уақыт, балам, - деп жауап береді.
Немересі түсінбеген сыңай танытып:
– Сонда қалай? Өмірдің осыншалықты қысқа болғаны ма? - деп сұрайды. Атасы да немересінің көңілін жықпай, сұрақтарына күлімсіреп жауап береді:
– Иә, балам! Өмір намазсыз азан мен азансыз намаздың арасындай, - дейді. Немересі қайта таңқала сұрайды:
– Намазсыз азан мен азансыз намаз деген сөзіңізді қалай түсінем, ата?
– Ботақаным-ау, өткенде көршіміздің баласы дүниеге келді. Сәбидің құлағына азан айтылды, есіңде ғой?
– Иә.
– Сол азанның намазы оқылды ма?
– Жоқ.
– Ол азан «намазсыз азан» болатын. Ал адам дүниеден қайтатын кезде оқылатын намаздың, яғни, жаназа намазының азаны айтылмайды. Міне, сол – «азансыз намаз». Ол намаздың азаны адам туған кезде оқылып қойған еді...
? https://t.me/muftyat_kz
? #ғибратнама
