БЕЙБАРЫС СҰЛТАННЫҢ 800 ЖЫЛДЫҒЫНА ОРАЙ БАЙҚАУ ЖАРИЯЛАНДЫ

Биыл Дешті Қыпшақ даласының даңқты перзенті, Ұлы даланың барысы, Мәмлүктер мемлекетінің негізін қалаған Бейбарыс сұлтанның 800 жылдық мерейтойы өтеді. Осыған орай Діни басқарманың төл басылымдары «Мұнара» газеті мен «Иман» журналы авторлар мен оқырмандар арасында «ҰЛЫ ДАЛАНЫҢ БАРЫСЫ – БЕЙБАРЫС СҰЛТАН» республикалық шығармашылық байқауын жариялайды.

 Байқаудың мақсаты: 

• Қазақ топырағынан түлеп ұшып Мәмлүктер мемлекетінің негізін қалаған Бейбарыс сұлтанның Ислам діні мен әлем тарихында қалдырған ерен еңбегін, Мәмлүктер мемлекетін басқарған басқа да қыпшақ сұлтандарының өшпес ізін көпшілікке насихаттау.
• Бейбарыс бастаған қыпшақ сұлтандары жайлы тарихи, тағылымдық, танымдық мақалалар жазу арқылы газет-журналдар оқырмандарына ой салу.

 Байқаудың міндеті: 

• Басылымдардың оқырмандарын ынталандыру, шығармашылық ізденісін, құлшынысын арттыру, бабалар ерлігін оқырмандарға сезіндіру.

 Байқау шарттары: 

• Байқауға Бейбарыс сұлтан және басқа да Мәмлүк мемлекетін үш ғасыр бойы билеген қыпшақ сұлтандары (Қалауын, Қайтпай, Барқұқ, Барысбай, Қансұқ, Тұманбай т.б) жайлы жазылған тарихи, танымдық, тағылымдық мақалалар (эссе, зерттеу т.б) қабылданады (өлеңдер қабылданбайды). Сондай-ақ байқауға Мәмлүк сұлтандығы мен Алтын орда хандығы арасындағы діни, дипломатиялық байланыстар (Бейбарыс пен Берке т.б) жайлы жазылған мақалаларды да жолдауға болады.
• Шығармашылық жұмыстар Microsoft Word түрінде жолдануы қажет. Мақала көлемі 14 шрифтпен, 1,0 интервалмен жазылуы және 5 беттен аспауы тиіс.
• Бір қатысушы бір ғана материал жібере алады. Шығармалар қазақ тілінде қабылданады. Байқауға қатысушылардың жасына шектеу қойылмайды.
• Бәйгеге қатысушылар жұмыстарына толық аты-жөнін, телефон нөмірін, мекен-жайын және өздері туралы қысқаша мәлімет қосып, iman@muftyat.kz электронды поштасына жолдауы қажет.

 Байқау талаптары: 

• Мақалалар «Ұлы даланың барысы – Бейбарыс сұлтан» деген белгімен қабылданады. Байқауға қатысушы «Мұнара» газетіне немесе «Иман» журналына жазылған болуы міндетті (түбіртегін бірге жолдау қажет).
• Шығармашылық жұмыстарды қабылдау 2023 жылдың 10 ақпанында басталып 2023 жылдың 10 қыркүйегінде (Астана уақыты бойынша сағат 00-де) аяқталады.
• Жоғарыда көрсетілген тақырыптарға қатысы жоқ, елімізді, тілімізді, дінімізді мансұқтайтын материалдар қабылданбайды. Шығармалардың тың, мазмұнды, сапалы болуына аса мән беріледі.

 Байқау барысы: 

• Байқау жеңімпаздарын кәсіби журналистерден және дін мамандарынан құралған қазылар алқасы анықтайды.
• Жеңімпаздар Мәуліт кешінде (нақты уақыты қосымша хабарланады) марапатталады.
• Жеңімпаз авторлардың шығармалары «Мұнара» газеті мен «Иман» журналында жарияланады.

Жүлде қоры:

Бірінші орын – Ұмра қажылығына жолдама

Екінші орын – 200 мың теңге (екеу)

Үшінші орын – 150 мың теңге (екеу)

Бұдан бөлек 5 адамға ынталандыру сыйлығы (70 мың теңгеден) беріледі.

Ұйымдастырушылар: 

Қазақстан мұсылмандары діни басқармасының «Мұнара» газеті мен «Иман» журналы 

Редакцияның мекен-жайы:

Астана қаласы, Қарасаз көшесі, 3.