Қала мешіттерінің молдаларына семинар өтті
Ақтөбе қалалық орталық мешітінде қала мешіттерінің молдаларына арналған семинар өтті.
Жаназа және жерлеу рәсімдерін бірізділікке түсіру мәселелері жөнінде өткен жиын халық арасында өлім-жітімге қатысты атқарылатын істерді жүйелеп, қоғамның аталған мәселеге қатысты діни сауатын көтеру қамтылды.
Семинарға арнайы қатысқан Ақтөбе қаласының бас имамы Алмат Әли молдалардың негізгі ұсыныс-тілектерін тыңдап, атқарып жатқан жұмыстар барысының қаншалықты деңгейде жүзеге асып жатқандығына баса назар аударды. Сондай-ақ садақа кезінде жайылатын дастархан мәзірін бірқалыпты ету, ысырапшылдыққа жол бермеу, аста-төк әрекеттерге ескерту жасау секілді маңызды ойларды атап өтті. Одан өзге марқұмды жоқтау кезінде асылық сөздер айту, шектен тыс дауыс көтеру, көңіл айтушылардың өзге дүниелік сөздерге берілуін уағыз-насихат барысында көпшілікке ескерту жөнінде де тілге тиек етті.
Семинар соңында алдағы уақытқа нақты жоспарлар бекітіліп, жауапты мамандарға міндетті жұмыстар тапсырылды.
Ақтөбе облыстық орталық
«Нұр Ғасыр» мешітінің баспасөз қызметі
